كوكو جاب الدمبلز
لما كتبت عن دمبلز كوكو...مكونتش عارف ان الموضوع ده يكون نهايته كده...كوكو كلمنى البارح علشان انزل معاه و هوه بيشترى الدمبلز...و روحنا وسط البلد على اساس اللى احنا ممكن نلاقى الكيلو هناك رخيص...لقيناه فى محل بسته جنيه الكيلو...و لقيناه فى محل تانى باربعه جنيه و نص ...و فى التوحيد و النور كان بتلاته جنيه...قلت لكوكو انه يشترى من ابو تلاته جنيه بس رفض...و قال لى ان الكواليتى بتاعتها مش كويسه...قولت له ان الكواليتى هنا مش مهمه...هو انت حتشترى جزمه و الا تى شيرت...ده شويه حديد بتشيلهم...المهم هو صمم يجيب من المحل ابو سته جنيه الكيلو...و كمان كلم صاحبه من الموبيل بتاعى علشان يسأله يجيبله معاه والا لأ...و جاب واحده عشره كيلو و واحده سته كيلو...و جاب لصاحبه كمان...و لما روحت له البيت ابوه زعق فيه لغايه لما قال يا بس...قال له:انا مش قولتلك انك ما تجبش اكتر من سبعه كيلو..برضه ما بتسمعش كلامى...انا تعبت معاك...معرفتش اربيك...و بعدين الحديد ده بيبوظ العضلات...مش قولتلك كده...عاوز تلعب حديد و تشيل خمسميت كيلو...روح النادى و اعمل كده...بس مش من فلوسى...انا حر...دى فلوسى...لازم ترجع الدمبلزالعشره كيلو حالا...لحسن حشحتهم لعيال البواب...و بعدين تعاله هنا...انت جبت الفلوس دى كلها منين...الخ الخ الخ...الواد كوكو طبعا كان وسط هدومه...و كانت الدمعه حتفر من عينيه...روحت واخده و نزلنا نتعشى بره...و انا كنت زعلان عليه...لأنه اصبح محبط جدا و مكتئب من الوضع اللى بقى فيه...و انا طبعا بتقطع من جوه لما اشوف حد من صحابى بيحصله كده...ده بيقوللى ان ابوه كل مره بيزعقله ادام صحابه...و اكتر بقه ادام الناس فى الشارع...معلش يا كوكو...استحمل...كله بثوابه...انا مش عارف ازاى بقول الكلام ده و باب النجار مخلع ...ياله...اهو كلام
No comments:
Post a Comment