Nile Beach
و انا ماشى على كبرى الانتحار لقيت ولد ساب فجأه صحابه اللى كانوا مشيين معاه و راح معدى سور الكبرى...طبعا اتفزعت لأنه كان ممكن يقع...ففضلت واقف اشوف بيعمل ايه...لقيته مسك خرطوم ميه طويل- ياريت يكون فعلا خرطوم ميه و مش سلك كهربا- و اتشعبط فيه و نزل لغايه شاطىء النيل...صحابه محدش فيهم اتجرأ ينزل وراه و فضلوا واقفين فوق الكبرى يتفرجوا عليه...الولد نزل غسل وشه من ميه النيل...و كان مبسوط اوى اكنه اول مره يلمس فيها ميه النيل... أو حتى يبقى قريب اوى كده من النيل...و بعدين اعد على شاطىء النيل مستمتع بالمنظر اللى ادامه... بصراحه...انا كان نفسى اعمل اللى عمله...احنا عندنا النيل محاط بأسوار من كل جانب علشان نتفرج عليه من بعيد...اكتر من كده ممنوع...اصل الناس اللى اشتروا النيل عاوزين برضه يحافظوا عليه...تخيل لو كان فى فعلا شاطىء نيل فى القاهره و فيه خضره بقه و زرع و اشجار تقعد تحتيها...كان اتملى ناس بحلل المحشى و لب و اكياس بلاستيك و عيال بتترتر و بت.. و ...بلاش نحلم احسن علشان معظم احلامنا بتطلع فى الاخر كوابيس
No comments:
Post a Comment