قواقع

فتحت شباك الاوضه

نيكو: هناك عاصفه

غسلت البيت بالميه

نينا: هناك فيضانات

جبتلهم خيار و خس

نيكو و نينا: نشكر الاله قع

حقيقه دستور الحياه

ما هي حقيقه دستور الحياه؟

فى الفتره اللى جايه في دستور جديد لمصر حايتصاغ...دستور فيه قوانين و احكام اساسيه علشان تساعدنا احنا كشعب نعيش مع بعض في تفاهم و سلام...المشكله هي...ازاى يصاغ...ايه اللى يبقى فيه و ايه الى يبقى مش فيه...ايه الصح...و ايه اللى فاكرينه صح...و ايه اللى حقيقى صح

 من اكبر مشاكل الحياه...هى ان الواحد يعرف فين الحقيقه

كنت من فتره بتناقش مع بعض الاصدقاء عن حقيقه الحياه...و وصلنا لموضوع حريه الانسان و حدود هذه الحريه...و تطرقنا لموضوع حريه طلب مساعد من شخص لإنهاء حياته...و إن فيه بلدان بتصرح بهذا الاجراء قانونيا...يعنى لو عاوز حد يموتك...روح للبلد دى و خلى حد يموتك...و كله بدون ملاحقه قانونيه...علشان القانون بيحلله

بس علشان أوضح علاقه الموضوع ده بصياغه الدستور بتاعنا...عاوز أوضح حقيقه دستور الحياه في موضوع زواج الأخ من اخته

اخ بالغ عاقل عاوز يتجوز اخته اللى برضو بالغه و عاقله...ينفع و لا لأ؟

القانون بيقول لأ غلط...المجتمع بيقول لأ غلط...الدين بيقول لأ غلط...الاخ و الأخت بيقولوا لأ صح

القانون بيقول غلط بسبب كذا و كذا...المجتمع بيقول غلط بسبب كذا و كذا...الدين بيقول غلط بسبب كذا و كذا...بس الأخ و الأخت بيقولوا صح بسبب كذا و كذا

مين فيهم صح و مين فيهم غلط

كل طرف شايف انه صح...من الناحيه العدميه حايقولوا العدميون ان ما فيش صح و ما فيش غلط...و من الناحيه النسبيه حايقولوا النسبيون ان يجب احترام كل وجهات النظر و تقبل الاختلافات حتى لو اختلفنا في الرأى...و من الناحيه الدينيه حايقولوا المتدينون ان الله انزل قوانين و حدود و لا يمكن تغييرها

في الاخر الأخ و الأخت حايعاقبوا بموجب القانون من المجتمع و حاتمنع هذه العلاقه و تنتهى القضيه

و لكن هنا تأتى القضيه الأخرى...و هي تأثير الاغلبيه على الاقليه...بمعنى ان الاغلبيه دائما تتغلب على الاقليه...و على الاقليه ان تمشى بقانون الاغلبيه...المجتمع هو الاغلبيه...الاخ و الأخت هم الاقليه...و الديموقراطيه تحاول ان تحترم وجود رغبات و متطلبات الاقليه...و لكن في النهايه الاغلبيه هي التي تحكم...بمعنى مدىو كيفيه الاخذ بمتطلبات الاقليه هى في ايد الاغلبيه...لو الاغلبيه قررت ان فلان يعدم...و الاقليه قالت لأ...لازم نحترم رأى الاغلبيه... و فلان سيعدم...حتى لو كان القرار غلط

و لكن هنا تأتى القضيه الأخرى...طب مين يقول ده حقيقى غلط...و ده حقيقى صح...العدميون حايقولوا تانى ما فيش صح و ما فيش غلط...لإن هذا القرار بيؤثر فيه مدى تقبل المجتمع و الدين و الاخلاق العامه و العادات و التقاليد و التاريخ و و و لموضوع فلان...يعنى مثلا من الاف السنين...لو كان المجتمع وقتها متقبل ان الأخ يتجوز اخته...ما كانوش حايعاقبوا...و لو بعد خمسين سنه من النهارده المجتمع متقبل موضوع الأخ يتجوز اخته...برضو ما كنوش حايعاقبوا

ناس حاتقول طبيعه الانسان الداخليه بتقول ان اخ يتجوز اخته غلط...و ناس حاتقول طب ما طبيعه الانسان الداخليه بتقول ان قتل انسان اخر غلط و برضو بتحصل...و المتدينون حايقولوا لا جدال في هذا الموضوع...الدين قال غلط يبقى غلط

و هنا نأتى للمعضله الكبرى...هل حريه الانسان و رغباته يقررها الانسان ام المجتمع...واحد عاوز يمشى عريان في الشارع...علشان هو من الاقليه يبقى غلط...واحد عاوز يشم مخدرات علشان هو من الاقليه يبقى غلط...واحده عاوزه تشذ مع واحده علشان هي من الاقليه يبقى غلط...واحده عاوزه تتجوز اربع رجاله علشان هي من الاقليه يبقى غلط...و هكذا

لو بدأنا بقانون اهميه عدم التعدى على حريه الاخر فلن ننتهى...انت ماشى عريان في الشارع ده بيؤذى نظرى...العريان حايقول انتى ماشيه بالنقاب ده بيؤذى نظرى...العريان حايقول انت ماشى بشبشب و ضوافر رجليك طويله و مقززه ده بيؤذى نظرى...و و و...فى النهايه الاغلبيه هي اللى حاتمشى كلامها على الاقليه

خوف الاغلبيه من ان تكون في يوم من الأيام اقليه و من استمرار الاقليه في المحاوله لتكون في يوم من الأيام اغلبيه بيجعل الناس اللى أتت إلى الحياه و لا تنتمى إلى اغلبيه أو اقليه...ان تقرر الانضمام إلى الاغلبيه ...مما يساعد في المدى البعيد على بقاء الاغلبيه اغلبيه...حتى يأتي الانشقاق من داخل الاغلبيه...او ثوره...او اختلاف وجهات النظر...لنبدأ باغلبيه أخرى

في كل جوانب الحياه في مصر هناك اغلبيه و اقليه...اغلبيه مسلمين و اقليه مسيحيين...اغلبيه فقراء...و اقليه اغنياء...اغلبيه اصحاء...و اقليه عندهم شلل نصفى...اغلبيه بياكلوا كشرى...و اقليه بياكلوا سيمون فيميه...اغلبيه بيشجعوا الاهلى...و اقليه بيشجعوا مزارع دينا...و هكذا

علشان نعرف نتعايش مع بعض في سلام محتاجين قانون ينظم أمور الحياه...هل نمشى على القانون الالهى...ان تكون الشريعه الاسلاميه هي قانون حياتنا...ام نمشى على قانون مدنى يحترم كل متطلبات فئات و أطياف و اتجاهات المجتمع...و لا الدستور مالهوش معنى اصلا

ناس تقول قانون الله هو الصحيح لإن البشر بتخطأ و عندهم أغراض سياسيه و اقتصاديه...ناس تقول ليه تمشوا قانون الله على ناس لا تؤمن بوجود الله...و ناس تقول انتم بتحللوا و تحرفوا قانون الله على اهوائكم...و في النهايه الاغلبيه تغلب الاقليه...لو الاغلبيه قررت ان دستور مصر يبقى شريعه اسلاميه...حايبقى شريعه اسلاميه...لو الاغلبيه قررت ان دستور مصر يبقى بوذا...حايبقى بوذا...و اللى مش عاجبه يروح يشوفله بلد فيها القوانين و الدستور اللى تناسبه...و اللى ملقاش...يقعد في بيته و يمشى جوه بيته عريان على راحته بس من غير ما حد يعرف...ينام مع اخته بس من غير ما حد يعرف...ما يقصش ضوافر رجليه بس من غير ما حد يعرف

بدأت الموضوع بسؤال...و لم اتوصل لإجابه... ويجب ان اعترف ان لا يوجد اجابه لهذا السؤال بعد...الاجابه قد تكون بعد الممات...و لكن حينها الوقت حايكون فات

قصتى مع الايدز

قبل ثوره يناير بسنتين سافرت الى يوروبا للهروب من الوضع الصعب في مصر... و طلعت بعثه للدراسات العليا كباب خلفى للاقامه في الخارج...و في الفتره الاولانيه كنت منبهر من الحياه في يوروبا...و كنت منغمس في الشغل و الدراسه... و سنه ورا سنه بدأت احس بالوحده و الملل...قررت انزل من فتره الى أخرى مصر ادور على عروسه و اكمل نص دينى...و لكن ما لاقيتش الواحده اللى تناسبنى...و لما سنين الوحده و الغربه بقت اتنين و تلاته و اربعه...كنت محتار هل اترك الشغل و الدراسه و الاقامه في يوروبا و استقر في مصر علشان اتجوز...و لا استمر على النظام كما هو عليه...فى فتره كنت مقرر اتجوز واحده اجنبيه و اكبر دماغى...و لكن ابويا و امى هددونى ان ده لايمكن يحصل...و ده مش تقاليد العيله...و ما ينفعش تكون مش فيرجن...و انت ابننا الوحيد...و ما تجيش تبوظ الحياه المثاليه  اللى احنا بانينهالك...و اصبر و صوم و الكلام ده...زمان بعد سن العشرين كنت تعبان بسبب الشهوه الجنسيه...و الوقتى بعد التلاتين ما بقتش قادر خلاص افضل فيرجن و امشى حالى بضرب العشره...فقولت لنفسى خلاص حاستمر في النزول من وقت الى اخر مصر ادور على بنت الحلال المصريه...بنت بلدى و تحدى...و في الوقت ده لغايه ما لاقى زوجه المستقبل امشى نفسى مع نسوان بلاد بره...مع انى عمرى في حياتى ما كنت اتخيل انى أوصل للوضع ده...بس مش عارف وقتها كنت بقول لنفسى اهو الضروريات تبيح المحظورات...و ربنا شايف و عارف قد ايه صبرت و تعبت و و و ...و الله غفور رحيم...المهم الموضوع ابتدى بلعب على خفيف و انتهى بالشغل اللى على تقيل...و انا علشان كان عندى ثقافه جنسيه...كنت بحافظ على نفسى من الامراض الجنسيه عن طريق استخدام التوبس...بس في مره من المرات الكوندوم اتقطع و ما عرفتش غير بعد انتهاء العلاقه الجنسيه...قلقت و سارحتها بمخاوفى بعد انقطاع الكوندوم...قالت لى انى ما اخافش علشان هى ما عندهاش امراض...و هي بتكشف على نفسها بصفه دوريه علشان عندها علاقات كتيره...قولتلها ده زاد الطينه بله و طلبت منها انها تروح تكشف علشان تريحنى فرفضت انى اتحكم في حياتها بالطريقه دى...انا من ليلتها و ما جاليش نوم...و اليوم اللى بعده روحت فورا للدكتور اطلب منه الكشف قال لى انى لازم استنى على الأقل تلات شهور قبل ما اكشف علشان الاختبار يبقى صحيح...قولت له ما اقدرش...من يوميها و انا مش عارف اركز في حاجه في حياتى...و لا في شغلى و لا في دراستى...كل يوم قاعد ادام النت ابحث عن طرق سريعه للكشف عن الايدز...لاقيت فحص سريع بس لما شوفت سعر الكشف انهرت...رقم ما اقدرش ادفعه...فى النهايه ادركت انى لازم اصبر التلات شهور...و ما فيش حل اخر...الوقت ده أصبحت انسان ميت...لا اكل و لا شرب ليه طعم...انفصلت عن العالم الخارجي...مش عاوز اكلم حد و لا حد يكلمنى...فضلت ليل نهار عمال اتفرج على يوتيوب اشخاص بيحكوا عن تجربتهم مع الايدز...و عن الادويه الكتيره اللى بياخدوها...و الجوانب السلبيه بتاعه الادويه...كنت باخرج كل يوم اتمشى لوحدى في الغابه...افكر ازاى حاعيش مع الايدز...ازاى حاخبى الموضوع ده عن بابا و ماما...و كل الاهل و الأصدقاء...طب حاجيب الادويه ازاى...مين حايقدر يدفع تمنها...هل أحاول اخد الجنسيه و افضل في يوروبا علشان اتجنب الاسئله من المجتمع في مصر...طب لو قولت لماما...يبقى ابنها الوحيد زانى و عنده الايدز...يعنى بدل مصيبه مصيبتين...و لو حد تانى عرف هل اضحك عليه و أقول انه بسبب نقل دم ملوث...ادمان...اصل الحاجات دى ما باقيتش تنفع تتقال اليومين دول...بالذات لو انا عايش في دوله اجنبيه...يعنى تهمه انى نمت مع عاهره لازقه في قفايه لازقه...ده انا لو كان عندى سرطان...كانت الناس طبطبت عليه و هونت من مصيبتى...لكن ايدز...حايقولوا يستاهل...بقى يبقى عنده نعمه انه يسافر بره و يدرس و هوه يرميها في الزباله بالنوم مع النسوان...اتفوه عليه انسان نجس وسخ...طب الدراسات العليا...طب الشغل...طب الجواز...مين حاترضى تتجوز واحد عنده الايدز...فكرت و لاقيت انه ممكن بس مع واحد تكون عندها الايدز زيى...طب انا طول عمرى نفسى في أطفال...ممكن في الوقت الحالي بالاساليب الحديثه...بس مكلف و صعب...و مع الادويه و المتابع الدوريه ممكن الناس تعيش اكتر من عشرين سنه مع الايدز...معقول يا ربى بعد ما تعبت طول حياتى و شقيت و اتهببت عملت كل اللى عاوزه والدى و والدتى...معقول تكون نهايتى كده...هل ده عقاب فعلتى في الدنيا...الدنيا كلها اسودت في عينى و اكتئبت اكتئاب شديد...كل يوم كان بيعدى سنه...و كل يوم بيزيد ضغط انى اتخلص من حياتى...موتى ارحم لى من حياتى مع الايدز.

يوم من الأيام صحيت و روحت السوبر ماركت اشترى اكل...و دايما باشترى الايس كريم العادى ابو يورو...و عينى جت على ايس كريم هاجن داز...و دايما أقول لأ ما اقدرش ادفع في ايس كريم سبعه يورو...فى اللحظه دى قولت ما انا كده و لا كده حياتى ادمرت...خلينى استمتع بحياتى و اشترى اللى نفسى فيه...طول حياتى عمال اقول اوفر فلوس التاكسى و اتمشى المشوار احسن...اوفر فلوس الديليفرى و اروح انزل اشترى البيتزا بنفسى احسن...انا اعمل ده و ده علشان فلان ما يزعلش... معلش بلاش سينما و تلفزيون و سماع موسيقا و اعمل معسكر مذاكره علشان  اخد امتياز...انا اموت نفسى في الشغل و افشخ نفسى في المذاكره علشان ابقى متفوق و اخد جايزه نوبل...انا لازم لما اتجوز اتجوز احسن بنت في الدنيا...اللى الكل يتمنى يتجوزها...اللى اموت في حبها...لازم اخلى بابا و ماما و الاهل و الأصدقاء و المجتمع كله مبسوط منى...الدنيا انتهت علشان تليفونى المحمول الجديد باظ...انا زعلان موت علشان شعرى بيقع و بابتدى اصلع...انا متضايق كيك علشان ما حدش عمل كومنت على البلوج اللى كتبته...انا الغضب ملينى علشان نزلت النهارده الصبح لاقيت حد خدش عربيتى...انا مقروف علشان السيكس باك بتاعى بقى كرش

طوووووووووووووووظ...كله طظ في طظ...ايه الهيافه اللى كنت عايش فيها دى...ايه العبط اللى انا كنت فيه ده...من لحظه ايس كريم هاجن داز بقيت ببص على الحياه من منظور تانى خالص...بقيت بعيش كل يوم على الاخر...مش لازم اشترى اغلى اكل أو اغلى لبس...بس بقيت بقدر نفسى و عيشتى...بقيت باحاول اهون على نفسى...اكافىء نفسى...اطبطب على نفسى...اهزر مع نفسى...كله بقى بييييييس...كله في اللذيذ...نفسى النهارده في الشيكولاته دى...خلاص خد الشيكولاته دى...نفسى النهارده ما اروحش الشغل...يلا اقدم على اجازه مرضى...نفسى النهارده ما اروحش الجيم...و ايه يعنى...مش قادر اذاكر النهارده...اذاكر بكره او بعده...المدير متضايق من التقرير بتاعى...طظ...دخلت السينما الفيلم طلع وحش...و ايه يعنى...الاهلى خسر الدورى...و ماله...اتنين بس من عشره اللى عزمتهم في عيد ميلادى جم...هايل...الواحد بيعيش مره واحده بس...يا تعيشها صح...يا تعيشها غلط...بطل تحسب حسابات بكره و المستقبل...عيش فى الحاضر...عيش النهارده.

و جه يوم الكشف الطبي...و الدكتور اخد منى عينه دم و قال لى لازم انتظر أسبوع على النتيجه...و فضلت ادعى لربنا و اتوب على الحاجات الوحشه اللى عملتها في حياتى...انا عرفت خطئى و قررت انى انا اللى امسك دفه سفينه حياتى...مش بابا و لا ماما و لا مجتمعى...قررت انى ارضى بالبنت اللى مكتوبالى...مش لازم تكون اجمل بنت و الا احسن بنت...مش لازم حياتى تبقى بيرفكت...مش لازم ابقى مشهور و متفوق...مش لازم كل الناس تحبنى...ارضى بحياتى كما هى...و اسعى للتغير إلى الاحسن إذ امكن...احسست فجأه بالحريه الحقيقيه...و حتى مع الايدز ربنا ان شاء الله يغفر لى و ادخل الجنه...و حتى لو طلع ما عنديش ايدز...حاكمل أعيش حياتى على اخرها...اكنى عندى الايدز...اكن كل يوم هو اخر يوم في حياتى

حياتى مع الايدز ما كانتش النهايه...حياتى مع الايدز كانت البدايه

الايدز في الموضوع بمعنى فيروس نقص المناعه البشريه

بعض التفاصيل تم تغييرها لتلائم الموضوع