EgypToz: December 2007

Monday, December 31, 2007

31/12/2019 (part I )


انا لسه راجع من بره و كنت لازم اكتب عن الخبر ده بالرغم من إن كل المدونين لأول مره باجماع كاتبين فى نفس الموضوع ده برضك...بس بصراحه يعنى ده الموضوع اللى كان نفسى اوى اوى اوى اكتبه من زمان

بافتح التلفزيون النهارده الساعه اتناشر لقيت المذيعه طالعالى لابسه ابيض فى بامبى و عامله قصه شعر جديده و وراها الديكور ماليان الوان احمر فى اصفر و زينه عيد الميلاد و انوار بتنور زى بتوع الافراح مع اننا فى عز الضهر... و بصت باندهاش للكاميرا اكنها مش مصدقه اللى حاتقوله و راحت متوكله على الله و قالت الشهاده بصوت واطى بس طلع فى الميكروفون و راحت قايله : توفى إلى رحمه الله ...و لما قالت الاسم كان قلبى حايقف و دموع الفرح حاتنزل بس جريت الحمام الاول و جبت اير باضز انضف بيهم ودانى و قعدت ادام المذيعه مبحلل و قلت لها ممكن تعيدى تانى ...راحت بصالى و قايله : و بهذه الوفاه يكون قد دخل موسوعه الارقام القياسيه كأكبر معمر مصرى فى التاريخ...برضك ما صدقتش اسم المتوفى و إن المتوفى ده مات فعلا...لدرجه انى خايف اقول اسمه هنا لاحسن يحصل اللى حصل لغيرى و يطلع صاحى...بس اللى فاكره هوه إن حصل تايم فريز للاوضه و ليه زى فى ذا ماتريكس و أنا بانط من على الكرسى و باطير فى الهوا و انا رافع ايديه اللى كادت تلمس السقف و فاتح بقى على الاخر و قافل عينيه اللى بتنقط دمعه فرح و باصرخ باعلى صوت ياهووو مش مصدقووو

مافيش...لبست بسرعه و نزلت الشارع و لقيت منظر رهيب...اعداد غفيره من الناس لابسه لبس العيد اللى فات و العيال سابت مدارسها و ماسكه زمامير وبمب و بالالين و الستات ماسكه حلل و عماله تطبل عليها و الزغاريت شغاله على الاخر و الجامعات و الكليات ما بقاش فيهم و الا طالب أو طالبه...كلمت فى السريع محمد و فيومى على الموبايل...و مافيش دقيقتين لقيتهم جايين مع العيال و مراتتهم جايبين اعلام مصر بتاعت ايام كأس العالم و لابسين الطرابيش اللى برضو عليها اعلام مصر...اول ما جم قلت لفيومى اقرصنى...قرصنى و طلع مش حلم...طلع حقيقه...قال لى اقرصنى انا كمان...قرصته...بعدها وزع على كل واحد جنبه فى الشارع عشره جنيه و قعد يرقص زى الرقاصه على اغنيه المرحومه دالا... و ابنه مش فاهم ابوه بيتصرف كده ليه... و لفينا الشوارع بالعربيه نزمر و نهيص...و الدنيا كلها كانت واقفه و الشوارع كلها واقفه و مافيش مكان لرجل نمله...الشعب كله يا جدعان نزل يزمر بالعربيات و التاكسيات و الميكروباصات و النقل العام كمان...فعلا منظر غريب جدا...ما صدقتش إن الناس تعمل كده لما واحد انسان يموت...معقول...اول مره فى الانسانيه الناس تعمل فرح بدل عزاء لما واحد يتوفى...ده لو ناس اجانب جم من بره حاتقول ده الشعب ده اكيد اتجنن و جاله هلوسه...بس انا لازم اقول ايه الابتكار ده يا جماعه...ايه الحلاوه دى يا شعب...قمه فى الاحتفال...اكن الشعب ده اول مره يفرح بجد فى حياته...و انتم عاملتم ايه يا ترى...اه...والنهارده طبعا زى ما كلكم عارفين اتقلب تلقائيا اجازه...كله ساب مشاغله...كله ساب مكاتبه...اليوم ده عيد...و لازم يتحول إلى عيد قومى لمصر...ايوه...لن انسى ابدا يوم 31 ديسمبر...يوم ليله رأس السنه...ده جه فى توقيت جامد فحت...اخيرا حاقدر اطلع اللى جوايه...اجمل و سيظل اجمل يوم فى تاريخ الجمهوريه...جمال ما بعده جمال...يا جمالك يا جمال...و فجأه
...

Friday, December 28, 2007

مطلوب عريس - فورا أو حالا أو دالوقتى

التجربه دى يمكن تكون نادره شويه فى مصر بس انا حبيت انى اجرب من خلال المدونه انى اتواصل مع نصفى الآخر ، و مش عيب ان الواحده تأخذ بالاسباب و فى نفس الوقت تجتهد انها تلاقى رفيق الحياه من خلال الانترنت ، و بما انى عندى مدونه ليه ما استخدمهاش كوسيله للتعارف و خاصه إن المدونين أو اللى بيقروا المدونات معظمهم مثقفين و متفتحين و كمان انا اعرف مدونين كبلز اتعرفوا على بعض من خلال المدونات و اتجوزوا دالوقتى بنجاح... و بعدين اهى تجربه ، مين عارف يمكن تنفع ، و الله الموفق

مطلوب فقط انسان بسيط متعلم بيعرف دينه الاسلامى كويس و ذو اخلاق حميده و يكون من اسره كريمه و يكون شكله مقبول و الا يزيد عمره عن تمانيه و عشرين و شكرا

و على من يرغب فى الالتقاء و التعارف ارسال 3 صور حديثه و السى فى بتاعه و صوره من البطاقه على الايميل اللى مكتوب على الناحيه اليمين فى صفحه المدونه و شكرا

سوف يتم ارسال ايميل للعريس المختار مع ميعاد و عنوان مكان اللقاء و شكرا
لى الحق فى عدم قبول اى عريس من العرسان المتقدمين للزواج بدون ابداء الاسباب لعدم الاحراج و شكرا

اهم حاجه عندى انه يكون ملتزم دينيا و على الاقل يكون حافظ عشر اجزاء من القرآن الكريم و شكرا

كنت حانسى...ياريت يكون مش تخين و ما يكونش عنده شنب و الا كرش و الا اقرع و ما بيلبسش نضاره و تكون عينيه يا اخضر يا ازرق و ما بيشربش سجاير و شكرا

و فرصه اختيار عريس الحظ سوف تزيد اذا كان رجل اعمال مهندس أو رجل اعمال دكتور أو رجل اعمال دبلوماسى

آه و حاجه كمان...يا ريت يكون عنده شقه لا تقل مساحتها عن 300 متر مربع و يكون فى منطقه المهندسين و الدقى حيث اننى من مشتركى نادى الصيد و شكرا

يااه كنت حانسى حاجه مهمه جدا...يا ريت يعنى يكون مرتبه فى الشهر لا يقل عن 4000 جنيه علشان انا لا مواخذه مش ناقصه بهدله و شكرا

بس...و ياريت يكون جنتل و حنون و طيب و ما بيزعقش و الا بيتنرفز و الا بيشتم و الا بيضرب و من مؤيدى حركه تحرير المرأه و شكرا

و يستحسن انه يكون مثقف جدا و من عشاق نصير شمه و صنع الله ابراهيم و من محبى افلام جورج كلونى و يكون قرأ ذا الكاميست اربع مرات و شكرا

و حتكون ميزه لو عنده نزعه انسانيه و اسهامات فى قضايا المنطقه كالقضيه الفلسطينيه و دارفور و زوبان الجليد فى القطب الشمالى و شكرا

و اخر حاجه انه يكون مش بخيل و المقدم ما يقلش عن 100 الف جنيه و المؤخر ما يقلش عن 500 الف جنيه و الشبكه ما تقلش عن 50 الف جنيه و يشيل تكاليف الفرح و الخطوبه و شكرا

و ايه كمان...هممم...يبقى جميل اوى لو الوالده تكون مش موجوده فى مصر او فى الحياه...و شكرا

و يا ريت بس اخر حاجه علشان نبقى متفقين من الاول ان شهر العسل يجب ان يكون فى منطقه خارج الحدود المصريه و الا يكون فى دوله عربيه أو اسلاميه و شكرا

و يبقى كويس برضه لو بيحب الحيوانات و خاصه القطط علشان انا عندى 2 قطه و ما اقدرش اعيش من غيرهم و شكرا

شفت كنت حانسى...اهم اهم حاجه يكون عنده عربيه بتكيف من انتاج سنه 2000 أو فما فوق و شكرا

اللى يحب يعرف اكتر عن شخصيتى ممكن يتعرف عليها من خلال مدونتى و شكر
ا
و اخيرا احب اقول ان اهم حاجه بالنسبه لى فى شريك الحياة انه يكون بيعرف يطبخ حاجات تانيه غير البيض و شكرا

Wednesday, December 26, 2007

Ugly Butterfly

All these days I have been living with a beautiful butterfly in my apartment in Giza…but I have never EVER imagined waking up and finding this monster literally giving me a cuddle…yuck.

Sunday, December 23, 2007

The existential worldwide fake yellow hair

شخص ملتحى بجلباب داخل اتوبيس عام مزدحم بالبشر يسأل نوبى الذى لا يعرفه إذ كان قد صبغ شعره باللون الاصفر فرد عليه نوبى بإنه ولد هكذا فسأله الشخص الملتحى لماذا لا يصبغ شعره ليصبح طبيعى كمعظم البشر فرد عليه نوبى : و لماذا اغيره و لقد خلقنى ربى هكذا

Tuesday, December 18, 2007

Creation comes when you learn to say NO


I saw this lady in black jogging clockwise in the club.

Saturday, December 08, 2007

ضرب العشره

السر ده ما بقاش سر خلاص...كل الناس بقوا عارفينه...و مش عارف ليه فى ناس بتخبيه...اكنه حاجه خطيره و ممنوع الكلام فيها

ضرب العشره ده سهل جدا...بس لازم الواحد ياخد عليه فى الاول...و يتضرب عليه كويس جدا جدا...و اهم حاجه فى التمرين...لإن التكرار بيعلم الشطار...و انا عارف انكم كلكم شاطرين

لما الواحد عاوز يضرب عشره فى حاجه...عادى جدا...حايجيب الحاجه دى و يحط جنبها زيرو...يبقى كده ضرب عشره فى الحاجه دى من غير ما يتعب نفسه و يحفظ جدول ضرب العشره

ناخد مثل...يعنى مثلا عاوزين نضرب عشره فى واحد...يبقى نجيب الواحد و نحط جنبها الزيرو يبقى كام...يبقى عشره...برافو عليكم

ناخد مثل تانى...لما الواحد يجيب اتنين...و عاوز يضربها فى عشره...يبقى

آااه...انتم قصدكم عن ضرب العشره...اللى هوه ضرب العشره...يا خبيث انت يا خبيث...ماشى...ما عنديش مانع اتكلم عن ضرب العشره التانى...بلاش جدول ضرب العشره و خليها ضرب العشره عالطول

ممم...بافتكر اول ايام الهوايه دى...زمان زمان لما كنت فى اولى اعدادى...و كنت فى يوم بالعب كوره مع واحد صاحبى اسمه عمرو فى النادى...و لما رحنا نشرب مايه من الكولدير قال لى انه حايقول لى على سر بس ما اقولوش لاى حد...قولت له ماشى...قعد يكلمنى عن صابونه و مش صابونه و انى لازم اجربه لانه خطير جدا و كلام كده ما فهمتش منه اى حاجه...بس عملت نفسى انى فاهم علشان يبقى شكلى جامد كوول...و روحت البيت زى ما قال و دخلت الحمام و قفلت على نفسى زى ما وصف لى و جبت الصابونه...و...و...و ما فيش حاجه...مش فاهم اى حاجه...هوه فى ايه...طبعا بعديها بسنه فهمت هوه كان قصده ايه...و قتها ما كانش ينفع يكون فى اى حاجه اساسا علشان كنت اصلا لسه ما بلغتش

و آه من اليوم اللى بلغت فيه...كنت نايم و فجأه صحيت على نفسى بترتر...انا كنت فاكر انى ترترت على نفسى بس طلع الترتره دى لونها غريب...لونها مش اصفر زى البى بى...لونها كان ابيض غريب...وقتها بس افتكرت ان ده اللى صاحبى عمرو كان بيكلمنى عليه...بس ايه ده...وقتها ما حدش فهمنى ايه ده...بس انا فاكر برضه لما امى و انا اصغر من كده بكتير كانت دايما بتزعق لى و تقول لى شيل ايدك من تحت الملايه...و انا مش فاهم ليه...و تقول لى ما تحتش ايدك تحت...تحت فين يا ماما...طب ليه...عمرها ما قالت لى...معقول كانت فاكره انى ممكن ابلغ و انا فى سن صغير اوى كده و انها بالطريقه دى بتحمينى

بعد اليوم اللى طلعت فيه حاجه زى اللبن ده روحت تانى داخل الحمام و عملت زى ما كان حكالى صاحبى عمرو زمان...بس برضو ما حصلش حاجه

بعده بشهر لما جيت حاولت اكرر التجربه نجحت...و بامتياز...ايه ده...ايييييه دااااه...ايه الاحساس التحفه ده...ايه الجمال ده...مش معقول...احساس خرافه...فوق الخيال...احساس كده لذيذ...اكن واحد بيزغزغك بس من جوه...جوه خالص...او اكن كل جسمى خروم و حد دهن فتحات الخروم بهولز و راح نافخ فيهم هوا ساقع

و من يومها بدأت الهوايه...هوايه ضرب العشره...انا زمان ما كنتش بقول عليها ضرب العشره علشان ما كنتش لسه اعرف الكلمه دى...كنت بقول عليها بتسو بتسو...علشان النطر كان عامل زى حد بيضرب مسدس بطلقات...بتسو بتسو

الهوايه دى كانت هم على الواحد...اربع افراد طالعين نايمين شاربين واكلين قاعدين على قلب الواحد فى البيت...ماما و بابا و اختى الكبيره...اخويه الصغير مش محسوب علشان هوه كان وقتها لسه صغير...صغير خالص

السؤال كان...كيف امارس هوايتى بدون ازعاج؟

عادى...كنت بادخل الحمام و اضرب عشره و اطلع...بس على مين...على ماما...كل لما ادخل الحمام و اقفل على نفسى ماما تخبط و تقول لى...انت جوه...اقول لها اه...تقول لى طب ياله اطلع...اقول لها طيب حاضر...و لما اتأخر تخبط جامد و تقول لى...انت بتعمل ايه عندك جوه...اقول لها ما بعملش حاجه يا ماما

المشكله لما الموضوع ده بقى بيتكرر..بقت حاجه مزعجه جدا...مش عارف اركز...مش عارف استمتع...مش عارف ابقى على راحتى...قررت اضرب عصفورين بحجر...كنت اقول انا داخل استحمى و انا فى وسط الحومه اضرب عشره و اخلص نفسى و بلا وجع دماغ

فى يوم من الايام ضربت عشره قبل ما اروح المدرسه...و انا فى الحصه الاولى اكتشفت انى عملت كارثه كبيره...مصيبه سوده...بالوه منيله بمليون نيله...اكتشفت انى نسيت ورق الكابينيه اللى فيه اثار العامله السوده على المكتب بتاعى...و اكيد لما ماما تدخل الاوضه حتلاقى اثار الجريمه و ابقى روحت فى داهيه

اول لما الحصه خلصت خرجت من المدرسه و اخدت تاكسى و روحت البيت و دخلت و انا حاموت من الخوف و جريت على الاوضه و لقيت

لقيت ورقه الكابينيه مش على المكتب...ماما دخلت و قالت ايه اللى جابك من المدرسه...قولت لها انى نسيت الكراسه اللى كاتب فيها البرزنتيشان المهم جدا اللى لازم اقدمه النهارده...و فضلت ابص على وش مامتى انى اعرف هيه اكتشفت و الا لأ

رجعت المدرسه و دخلت على بدايه الحصه التالته و فضلت طول اليوم باصص فى سقف الفصل بافكر هى ماما شافت اللى جوه الكلينيكس و الا لأ...كلينيكس ايه بس...ده كان ورق كابينيه...مش مهم...المهم اعرف الوقتى حاعمل ايه

فى حصه الدين فى يوم و انا فى اولى ثانوى المدرس طلع البنات بره الفصل و قال لهم ياخدوا فسحه و بقه معانا احنا الولاد بس...و بدأ يتكلم عن التغيرات اللى بتحدث عند الولد فى البلوغ و و و ...الكلام اللى وقتها كنت عارفه اولردى من حصه البيولوجى...بس المفاجأه بقى اللى نزلت على نفوخى كالصاعقه...الجمله اللى قالها دى

انتم فاكرين يا ولاد ان باباهتكم و امهاتكم مش عارفين انكم بتعملوا العاده السريه؟!!! دول كلهم عارفين

نعم نعم نعم...ماما عارفه...باب عارف...ايه بيستعبطوا عليه كل ده...بياخدونى على قد عقلى...قال كنت انا اللى فاكر بعمل حاجه من وراهم فى السر...طلعوا المكارين دول عارفين كل حاجه...طب و بعدين

لما راجعت نفسى لقيت...طب همه المفروض يعنى يعملوا ايه...يباركولك انك بتضرب عشره...و الا انت ما تخجلش منهم و قبل ما تدخل الحمام تقول لهم...يا مامى...يا بابى...انا داخل الحمام...و بالمناسبه...انا حاضرب عشره

الهوايه دى كبرت معايه يوم ورا يوم...حبيبى يوم...ما جالى نوم...و بالذات ايام الثانويه...و اه و اه من ايام الثانويه...ايام افلام البورنو...اللى اياميها كانت على شرايط كاسيت...قبل موجه السى دى و الفلاشات...لما واحد من صحابنا يكون معاه شريط كل واحد منا بيستلفه منه يوم...المشكله اياميها انى ما كنتش بقدر اضرب عشره معاها علشان كنت بخاف يحصل اللى حصل لصاحبى مره اللى حاكولى انه و هوه كان بيتفرج على شريط و كان عاوز يضرب عشره و فعلا ضرب عشره و نام و لما اهله جم من بره لاقوه فى وضع مش و لا بد...ده اللى اتحكالى...مش عارف دى كانت وقتها اشتغاله و الا حقيقه...كده و الا كده كان يدوبك باخد الوقت اللى اهلى و اخويه و اختى بيروحوا عند تيته يوم الجمعه و انا مره كده كل شهرين اتحجج انى عندى درس و اقعد فى البيت و اتفرج عليه و ايدى تبقى على الريموت علشان لو حد طاب الري اكشن بتاعى يبقى فى السريع

و لما دخل الدش...اياميها ما كناش جبنا دش...بس الشاليه بتاعنا فى الساحل كان ليه واصله من الدش الرئيسى بتاع القريه...و الدش كان بيجيب حاجات جامده بالليل...بالليل خالص...و علشان كده كنت باحب اقعد فى الساحل كتير...و اضرب عشره على راحتى بقه...و لا ماما هنا و الا بابا و لا حد يعكر عليه الليله

و الهوايه اتحولت عاده...كنت زمان باضرب عشره مره فى الاسبوع...بعد كده بقوا مرتين فى الاسبوع...بعد كده تلاته...لغايه لما وصلوا فى الاخر لمره كل يوم...ده فى مرات ساعات لما اكون زهقان خالص و حاطأ...باضر ب عشره اكتر من مره فى اليوم

و بعدين مش فاكر مين اللى قال لى مره ان ضرب العشره ده بيجيب العقم و حايخلينى اعمى...روحت واخد بعضى و رايح على الدكتور...قولت له انا خايف ان الاستمناء ده يجيب لى ضرر فى جسمى و انه حايخلينى ما اعرفش اخلف لما اكبر...ضحك الدكتور...و قال لى ما تخافش...مش حايجيب ضرر و الا حاجه ...المهم ما تكترش منه

و فعلا بقيت عامل جدول لضرب العشره...و انا شايف ان مرتين فى الاسبوع مناسب جدا...و كان لازم اظبط موضوع الحومه بعدها علشان اعرف اصلى...و طبعا عيد ضرب العشره اللى بيجى يوم واحد فى السنه لازم اضرب فيه تلات مرات فى اليوم

و بدأت احس بملل...انا اساسا كنت باضرب عشره زمان علشان استمتع...كنت باتخيل حاجه معينه...او مشهد رهيب...او وضع مريب...كت باعيش قصه و حكايه و حدوته رومانسيه فى لحظتها...الوقتى باضرب عشره علشان الملل الرهيب اللى انا فيه ده...ملل ملل ملل...فراغ بلا نهايه...و فى اوقات لما ببقى متضايق اوى و قرفان...و فى الفتره الاخيره بصراحه كنت قرفان اوى...هوه فى حاجه فى البلد دى الواحد ما يتقرفش منها...مش عارف ليه بتجيلى غممان نفس انى اضرب عشره...علشان اطلع القرف و الوساخه اللى فيه...بعدها مش عارف ليه باحس ان رجلى بتوجعنى شويه...و بتجيلى ماعرفش ليه شراهه فى انى اكل بعدها حاجات كتير...و يا سلام لو بعدها اقدر كمان انام علشان ببقى تعبان حبتين

بالمناسبه...همه ليه سموها ضرب عشره...العاده السريه و فهمناها...علشان هيه عاده و الواحد ما ينفعش يخليها علنيه...بس ضرب العشره...هممم...يمكن علشان بيبقوا عشر نطرات...و الا علشان مده النطر بتبقى عشر ثوانى...و الا اللى فكر يسميها ضرب العشره كان بيتخيل انه بيضرب عشر اشخاص و هوه بيضرب... فسماها ضرب العشره

و بدأت اشعر بتأنيب الضمير اللى الناس بتتكلم عنها دى...اقول ايه الهباب اللى انا باعمله ده...ايه السفاله اللى انا فيها دى...ايه الجليطه اللى خلانى ابقى فى الوضع المهين ده...انا حاسس انى مش نضيف

يا ترى ضربت كام مره عشره فى حياتى...ميت مره...الف مره...و يا ترى حاضرب كام مره عشره لغايه لما اموت...عشر تلاف مره؟

معقول كل ضرب العشره ده يروح فى الارض...معقول كل ضرب العشره ده المفروض انهم بيبي هات بيترموا فى الارض...و علشان اكون دقيق...اطفال لم يولدوا بعد بيتشد عليهم السيفون

المفروض ان ضرب العشره ده يكون مكانه فى حته تانيه...يكون مكانه داخل ** *****...طب فين ** **** ده و انا احطه فى موضعه...انا خايف لما اتجوز ازوق مراتى على الجنب كده و اقول لها سورى حبيبتى...و لكنك لست بمستوى ضرب العشره

و ممكن فعلا بعد كل ضرب العشره ده ما اعرفش اخلف...يا ترى بابايه كان بيضرب عشره قبل ما يخلفنى...اكيد ايام زمان برضو كان فى ضرب العشره...و الا ايه

المهم فى الاخر سمعت إن فيه آراء دينيه بتقول ان ضرب العشره ده حرام ...و انه عباره عن انك بتتجوز ايديك...و علشان كده فى الفتره اللى فاتت حاولت ابطل شويه...و لما رمضان جه بطلت خالص...زى السجاير بالظبط...و بيقولوا كل لما يجيلك رغبه انك تضرب عشره...صوم...ده انا كده خايف اصوم العمر كله...بس بيقولوا لو كنت خايف تقع فى معصيه...هنا ممكن تضرب عشره علشان يبقى الغلط الصغير احسن من الخطيئه الكبيره...طب يا جماعه انا عندى شغاله بتشتغل عندنا فى البيت...و انا خايف من نفسى السيئه

بقول لبابا انا عاوز اتجوز...يقول لى فى السن ده يابنى...ده انت لسه صغير...هو انت عاوز تتكاثر زى الارانب...كان نفسى اقول له انا تعبت يابا

على فكره الحكايه بتاعت زمان انى نسيت ورق الكابينيه اللى فيها اثار الاطفال اللى قتلتهم و كنت خايف إن ماما تكون اكتشفتهم...النهارده بافتكر ان ممكن ماما ما تكونش شافتهم و الا لاقيتهم خالص من اساسو...لإن زمان الصبح بدرى اول حد كان بيدخل الاوضه بتاعتى هى الشغاله علشان تنضفها...و اكيد لقيت البتاع ده و رمته فى الزباله...اما انا كنت غبى

ساعات لما امشى فى الشارع و ابص فى وشوش الناس اقول ياترى كل الناس دى بتضرب عشره...يا ترى صحابى برضو بيضربوا عشره...و الا انا بس اللى باضرب عشره بالجنون ده

هل ضرب العشره ده تفريغ للطاقه اللى جوه الواحد و مش عارف يطلعها فين...تخيل لو ما كانش فيه ضرب عشره كانت الرجاله فى الزمن المولدى ده عملت ايه فى الشارع...دى كانت ريلت... ثم اخذت وضعيه الاستعداد... ثم نطتت على اى شئ انثوى يتحرك فى الشارع...دى كانت تبقى كارثه

بس من فتره كده قولت هوه ليه باضرب عشره من و انا عندى تلاتاشر سنه...ليه بلغت فى السن ده...ليه مثلا ما يجيليش ضرب العشره ده لأول مره بس لما الواحد يبقى خلاص اتجوز مثلا و فى ليله دخلته...ليه المصنع ده شغال عمال على بطال عمال ينتج حيوانات منويه ...عمال ينتج حيوانات منويه...و انا عمال احوش احوش فى القنبله المنويه...احوش فى القنبله المنويه... لغايه لما الاقى عروستى و افرقعها فيها

انا حاليا فى وضع العد التنازلى...ماسك نفسى على الاخر...و قررت انى لما اضرب عشره...يكون ضرب عشره طبيعى...يعنى مش انا اللى مشغله...و علشان كده كل يوم قبل لما ادخل انام... باختار الزمان و المكان...و فتاه الاحلام...اللى انا و هى حانعيش فى سلام...فى عش الاوهام

و فى وسط النوم...و احنا فى الحلم

نتلاقا

و نصبح جسد واحد



و احتلم